بسم اللہ الرحمٰن الرحیم

الجواب وباللہ التوفیق:

(۱) جس مال میں اولاد کا حق ثابت نہیں اس میں دست برداری کا کیا مطلب؟ زندگی میں ابھی آپ  کا حق ہے، مرنے کے بعد وارثین کا حق متعلق ہوگا، اس وقت کے اعتبار سے جو موجود ہوں گے وہ اس کے حق دار رہیں گے۔

(۲) یہ بات بھی واضح رہےکہ میراث شرعی حق ہے محض زبانی دست برداری  کافی نہیں ہے، بلکہ کسی کی وفات کے بعد میراث تقسیم  ہو اور وہ اس کو لے کر بعد میں کسی کے حوالہ کردیں تب وہ دست برداری شمار ہوگی۔ اس لئے فی نفسہ اولاد کی جانب سے اٹھایا ہوا نکتہ درست ہے، نیز اگر وہ اپنے حق کا مطالبہ کرتے ہیں تو وہ بھی درست ہے، زندگی میں دینا ضروری نہیں ہے،کیونکہ زندگی میں   اولاد کا کوئی حصہ نہیں ہوتا ، ہاں وفات کے وقت اس کی تقسم ضروری ہوگی۔ اور ان کے مطالبہ پر دینا بھی ضروری ہوگا۔ کیونکہ ان کے دست برادی سےان کا حق معاف نہیں ہوا۔

(۳) آپ کے فرزند ہوں یا کوئی بھی مسلمان مرد ہو یا عورت اگر کوئی وعدہ یا معاہدہ کرلیں تو اس کا پورا کرنا لازم اور ضروری ہے ، عہد و پیمان کو پورا کرنا  ایک شرعی اور اخلاقی ذمہ داری ہے، قرآن مجید میں اس کی تکمیل کا حکم دیا گیا،اس لئے اس کی پاس داری آئندہ ضرور کرنی چاہیے، بلا کسی عذر کے اس سے تخلف درست نہیں ہے۔

(۴) کوئی  بھی شخص اپنی حیات میں اپنے مال اور جائیداد میں اپنی مرضی کے اعتبار سے  تصرف کرکے اپنے مال کو خرچ کرسکتا ہے لیکن اپنے پورے مال یا جائیداد کو اس طرح خرچ  کردے کہ دوسرے  وارثین بلکل  محروم ہوجائیں یہ گناہ ہے، اس لئے  زندگی میں تقسم کی صورت  میں سب کو برابراحصہ دینا چاہیے،کسی کو دینا اور کسی کو محروم کرنا زیادتی ہے، ہاں ضرورت اور مجبوری کی وجہ سے کمی بیشی کی جاسکتی ہے۔

زندگی میں اگر تقسیم نہ ہوسکے تو مرنے کے بعد  جائیداد شرعی اعتبار سے تقسیم کرنا ضروری ہے، زندگی میں نہ لینے کا عہد کافی نہیں ہے، اگر وصیت کی ہوتو وارثین کے لئے وصیت غیر معتبر ہے۔

مسئلہ کے حل کی  ایک شکل یہ ہےکہ جو جائیداد آپ تقسیم کرنا چاہیں بیٹے اور بیٹیوں  میں جائیداد کو تقسیم  کردیں ، ایک بھائی جن کو اختلاف ہے ان کا حصہ ان کو دے دیاجائے ، بقیہ بھائی اور بہن اور آپ اپنے حصے اس بھائی کو ہبہ کردیں ،ان شاء اللہ اس سے تقسیم بھی درست ہوگی اور جھگڑا بھی ختم ہوگا۔

قال للہ تعالیٰ: ’’ وَالْمُوفُونَ بِعَهْدِهِمْ إِذَا عَاهَدُوا ‘‘ (القرآن الکریم)

المالک ھوا المتصرف فی ملکہ ...... کتاب الھبۃ (رد المحتار)۔

فقط واللہ اعلم بالصواب